Eth conselhèr a avalorat es chifres plan bones dera ocupacion otelèra pendent eth periòde de Nadau enquia Cap d’An e Reis, damb ua mieja deth 90 % e moments deth 95 %. “En 15 dies, i a agut ues 320.000 estades, tant otelères coma extraotelères”, segontes Serrano. Eth sector coïncidís en destacar qu’aguesta chifra rècord se produsís en ua des mielhores epòques d’esquí qu’a agut era Val d’Aran ath long dera sua istòria.

Per prumèr còp, es visitaires de França ja supòsen un 20 % des toristes que visiten era Val en iuèrn. Es oficines de Torisme Val d’Aran an detectat tanben un elevat numero de toristes procedents de païsi coma Israèu e Règne Unit.

Ath delà, eth sector a agut de hèr front ar increment de 800 places otelères dempús dera dubertura, hè dus ans, des otèls dera Val de Ruda. Damb tot, s’a mielhorat era ocupacion mieja annau.

Serrano considère que “es chifres son un èxit que cau atribuir ath trabalh realizat per Torisme Val d’Aran a trauèrs de totes es accions toristiques desvolopades aguesti ans, atau coma ara inversion de Baqueira Beret en infraestructures, er esfòrç continu deth conjunt deth sector e era apòsta decidida deth Govèrn d’Aran entà promòir e comercializar era Val d’Aran e tota era sua ofèrta toristica, comerciau, culturau, de léser, eca”.

Era creacion de naui portaus webs de destinacion, er increment dera participacion en diuèrses hèires toristiques internacionaus, es trobades realizades damb touroperadors estataus e internacionaus o era promocion dera Val d’Aran enes aeropòrts francesi an estat es principaus esturments de trabalh entà arténher er increment de toristes enes darrèri ans.

Conselhèr Juan Antonio Serrano. Conselhèr Juan Antonio Serrano.