Era Val d’Aran, per miei deth sòn servici de transpòrt sanitari, a començat a intercambiar experiéncies formatives des professionaus que se dediquen a atier es emergéncies mediques. Eth Conselh Generau d’Aran, a trauèrs deth Servici Aranés deth Benèster e era Salut (SABS), a signat aué un acòrd de collaboracion damb eth Servici d’Emergéncies Mediques de Catalonha (SEM) entà establir un marc de desvolopament conjunt d’activitats de formacion contunhada e de recerca.

Ei eth dusau convèni qu’eth Conselh signe damb eth SEM dempús dera signatura deth prumèr protocòl de cooperacion en situacions d’urgéncies e emergéncies ordinàries e en transpòrt interespitalari, plasmat eth passat mes de noveme.

De hèt, aguesta setmana a començat eth prumèr cors en encastre deth transpòrt segondari d’emergéncies, damb ua plan bona acuelhuda per part des professionaus. Eth sindic d’Aran, Francés Boya, a assegurat qu’era signatura d’aguest nau convèni “supòse un pas mès entà dauant des nombrosi qu’en aguest mandat a dat eth Govèrn aranés en camp dera mielhora dera atencion integrau des persones”. Ath delà, “se cristalize era volentat deth Conselh entà trabalhar conjuntament e mielhorar era qualitat de vida deth ciutadan”.

Er acòrd, signat pera responsabla deth SABS, Maria Àngels Borràs, e eth president deth SEM, Jaume Estany, permet somar esfòrci, compartir coneishements e mielhorar era eficéncia deth servici. Tant eth SEM coma eth SABS aufriràn eth sòn catalòg d’accions formatives ar auta organizacion. Cada accion formativa o conjunt d’accions seràn objècte d’un acòrd especific eneth quau s’estipularàn es condicions e es responsabilitats d’andues parts ena garantia deth rigor e era qualitat des practiques.


Eth Conselh Generau d’Aran a signat aué un acòrd de collaboracion damb eth Servici d’Emergéncies Mediques de Catalonha (SEM).