En totau, supòsen mès de 250 supòrts visuaus despartidi entre es aeropòrts d’Orly e De Gaulle en París e es de Tolosa e Tarbes. Se tracte d’ua mesura que compde damb un pressupòst de 250.000 èuros e qu’afectarà a un totau de lèu 40 milions d’impactes visuaus e mès de 12 milions de persones. Tanben s’a creat un portau web damb era adreça www.essencedespyrenees.com.

Damb eth plan de promocion entà 2008, qu’eth sindic Francés Boya e eth conselhèr Juan Antonio Serrano an presentat aguest maitin ena Assemblada Generau de Torisme Val d’Aran en otèl Tuca de Betren, “se complís un des objectius que mos auíem mercat damb eth convèni de collaboracion damb Turespaña entà internacionalizar eth torisme aranés”, atau coma a declarat eth Sindic. Entà Francés Boya, “aguest ei eth prumèr còp que mos plaçam ena mapa internacionau, causa que mos permeterà ampliar eth nòste mercat”. Tanben a assegurat qu’eth Conselh Generau priorizarà ath madeish viatge era promocion enes zònes mès propères a Aran, coma eth sud de França, perqué “supòsen un potenciau important ara qu’eth torisme de proximitat se torne a practicar damb fòrça pera afectacion dera crisi economica globau dempús d’ua epòca de desplaçaments entà destinacions aluenhades”.

Totun, eth conselhèr Serrano a explicat qu’era campanha s’a agut de méter en marcha aguest iuèrn pr’amor qu’eth finançament deth convèni s’auie retardat dera sua signatura ençà degut as cambis organics en Govèrn d’Espanha dempús des eleccions generaus, causa qu’a hèt replantejar eth plan en tot reforçar era promocion dera activitat de nhèu e en tot mantier-la entàs activitats complementàries de gastronomia, senderisme, BTT, patrimòni, benèster e natura que dongue compliment ar objectiu entà arténher era desestacionalizacion deth torisme aranés. En aguest sens, eth Sindic s’a referit ara “oportunitat d’amiar entà duant era promocion en aguesti moments pr’amor dera crisi economica e dera fòrta competéncia d’autes destinacions d’esquí”.