Era fira, qu'a lòc pendent aguesta dimenjada en centre de Vielha, acuelh un totau de 45 estands de diuèrsi marchands aranesi, procedents era màger part de Vielha, Les, Bossòst e Naut Aran.

Eth sindic Boya a manifestat qu'era organizacion d'aguesta hèira "ei frut dera iniciativa des comerciants qu'eth departament de Torisme, Comèrç e Transpòrt a amiat entà dauant en tot amassar-ne ua grana representacion deth sector damb era finalitat de dar-le a conéisher laguens deth país e tanben entàs visitaires que recep aguesti dies era Val d'Aran". Segontes eth Sindic, "en tempsi d'incertesa economica, ei important èster ath costat d'un des sectors mès subergessents en ensem dera economia aranesa". En aguest sens, eth conselhèr Serrano a explicat qu'era d'engoan "consitusís ua edicion de pròva qu'a d'auer contunhitat entà consolidar AranMarket coma un eveniment de referéncia que refortilhe era activitat comerciau ena darrèra epòca der ostiu". Serrano contemple era possibilitat de descentralizar era hèira en uns auti vilatges, a on eth comèrç a un pes fòrça important entara economia locau.

AranMarket expause tot tipe de productes, des de ròba a productes tipics delicatessen, tant en prumères mèrques coma en auanci de sason e rebaishes. Damb orari d'11.00 a 20.00 ores, era fira se place en airau dera plaça dera glèisa e eth còto Março. Cau rebrembar qu'eth comèrç d'Aran genère trabalh a 900 persones (entre propietaris e trabalhadors) e compde damb mès de 350 establiments, que representen 45.000 mètres quarrats de superfícia comerciau.

Foto d'AranMarket. Imatge d'AranMarket.