Francés Boya s’a referit, en prumèr lòc, ath Partit Popular (PP), qu’a recorrut era norma en Conselh de Garanties Estatutàries. Aguest organ emetec eth sòn dictàmen favorable era setmana passada. En aguest sens, eth sindic s’a mostrat satisfèt pera “constitucionalitat dera lei, qu’eth Conselh de Garanties Estatutàries a avalat ara fin”.

Tanben a criticat as grops de Convergència i Unió (CiU) e Esquerra Republicana de Catalunya (ERC), perque “s’auessen volut, auien era possibilitat de mielhorar eth redactat dera lei, en tot retirar deth tèxte era mencion ar usatge preferent establit entara lengua”, ena linha dera interpretacion deth Tribunau Constitucionau respècte dera lengua catalana. En aguest cas, eth PP semblaue disposat a retirar eth sòn recurs, segontes Boya.

Eth sindic demore poder aprovar era lei der aranés en seteme, se se reempren era activitat parlamentària abantes des pròplèu eleccions autonomiques, previstes entara tardor.

Intervencion deth sindic en Parlament. Intervencion deth sindic en Parlament.