Eth sindic d’Aran, Francés Boya, a visitat aguesta setmana es òbres deth nau Centre d’Innovacion Empresariau dera Val d’Aran (o Centre Europèu d’Empreses e Innovacion), qu’eth Conselh Generau promò en antic otèl de Casau. Era empresa Constructora Elio S.A. bastís aguest equipament, que compde damb ua inversion d’1,5 milions d’èuros. Boya a declarat qu’aguesta òbra, fòrça auançada, “aportarà coneishement e naues formes de promocion economica e ocupacionau entara Val d’Aran”.
 
Eth centre devierà un esturment estrategic entara economica aranesa, perque darà supòrt tecnologic as empreses, acuelherà naues iniciatives empresariaus de joeni e emprenedors e promoirà era formacion en estudis superiors e era investigacion tant de seguretat aupina coma der àmbit toristic, entà atrèir naui mercats.
 
En aguest sens, eth Conselh Generau a organizat ua session informativa entà dar a conéisher aguest nau centre, en un acte public qu’aurà lòc deman, 25 de març, entàs 20.00 h, ena sala d’actes deth Conselh, en Vielha. Era session informativa compde damb era collaboracion e eth supòrt tecnic der Institut Municipau d’Ocupacion der Ajuntament de Lleida.