Aguesta actuacion, avalorada en mès de 500.000 èuros, consistís en acabar es itineraris de natura, bastir es miraders de fauna e es barratges entàs animaus, atau coma condicionar es passarèles de husta e es plataformes metalliques.

Dempús d’aguesta intervencion, ei previst de crear enguan un estanh artificiau, hèr mès barratges entà animaus e adequar ua bastissa de servicis. Atau madeish, eth Govèrn ven de modificar eth sòn pressupòst generau entar aqueriment des terrèns qu’an de completar eth perimetratge deth Parc per un impòrt de 230.000 èuros. Aguesti terrèns non auien estat aqueridi abantes de començar a executar eth projècte en 2004. En totau, eth Conselh aurà invertit 1 milion d’èuros pendent aguest an 2009.

Eth sindic Francés Boya s’a mostrat fòrça satisfèt per inici d’aguestes òbres deth Parc deth Portilhon, un projècte que, segontes a manifestat, “a estat reorientat entà dar-li mès coeréncia des deth punt d’enguarda conceptuau e dera sua viabilitat economica”. Se tracte de hèr deth Parc “un centre referent ena interpretacion dera montanha” en tot mostrar ath public es ecosistèmes pròpris deth parçan e en tot incidir enes condicions de naturalitat des installacions entà ajudar a compréner mielhor es requeriments ecologics de cada espècia.

En aguest sens, eth Govèrn d’Aran e er Ajuntament de Bossòst trabalhen un projècte comun damb era localitat francesa de Luchon entà convertir eth parc en punt nodau d’un circuit de montanha transfronterèr en marc deth pòrt deth Portilhon.

Aguesta setmana an començat es òbres. Aguesta setmana an començat es òbres.