D’aguesta forma, es ciutadans aurien un mes mès de tèrme, enquiath dia 10 de deseme, entà informar-se sus eth Plan director urbanistic, disponible dejà enes Ajuntaments dera Val d’Aran e en portau web deth Departament de Politica Territoriau e Òbres Publiques dera Generalitat.

Ath delà, eth Conselh, que ja balhe es sòns servicis d’assessorament tecnic as municipis petits, seguirà facilitant er accès ara informacion publica, en tot respectar era autonomia locau des Ajuntaments, que, amassa damb era Generalitat, son es administracions competentes dera tramitacion deth Plan director urbanistic. En aguest sens, cau tier en compde que “eth Plan director non substitusís es Normes Subsidiàries, senon qu’aplique es estratègies territoriaus e quantifique es creishements establidi dejà en Plan Territoriau”, aprovat en 2006, atau coma a explicat eth vicesindic 1èr e conselhèr d’Administracion Publica e Finances, Rufino Martínez.

Era decision s’a prenut en session plenària, amassada de forma extraordinària a demana deth grop ena oposicion de Convergéncia Democratica Aranesa (CDA), que, ena sua propòsta iniciau, reclamaue ampliar eth tèrme enquiath mes de gèr de 2010 e eth traslat der expedient deth Plan director urbanistic ara sedença deth Conselh Generau, que non a competéncies urbanistiques, per èster sedença dera Comission Territoriau d’Urbanisme.

Fin finau, s’a acordat alongar eth tèrme enquia deseme e, atau coma succedís ara, facilitar en Conselh era consulta dera còpia tecnica deth projècte, en tot auer present qu’es responsables dera tramitacion deth Plan son era Direccion Generau d’Urbanisme dera Generalitat e es Ajuntaments afectadi.

Session plenària. Session plenària.