Era Val d’Aran ei aguest còp era protagonista des planes principaus dera revista lidèr en sector dera geografia e es viatges en Catalonha, damb ua difusion mieja de 16.000 exemplars.

En tot auer present qu’Aran ei ua destinacion toristica de prumèr nivèu e damb er objectiu de surpréner ath lector, es articles sus era Val, escriti per collaboradors que coneishen d’apròp era realitat aranesa, incidissen en aspèctes pòc coneishudi que representaràn un descurbiment entath public.

“Se hug deth topic en tot mostrar es interioritats d’Aran”, atau coma a soslinhat eth Sindic. Aguestes interioritats se tròben, en paraules de Morales, en “es espacis naturaus, era identitat dera sua gent e er univèrs cromatic des muraus e retaules des glèises”, entre d’auti encastres.

Totun, Aran “ei un lòc plen de sensacions, mès enlà des possibilitats qu’aufrís era nhèu”, segontes eth director. Tant Boya coma Morales an coincidit en assegurar qu’aguest numèro de Descobrir Catalunya signifique ua oportunitat entà balhar a conéisher un territòri que se tròbe en ua posicion privilegiada ena articulacion d’un discurs toristic innovador, pr’amor qu’eth desvolopament d’aguesta activitat pòt vier determinada pes critèris dera sostenibilitat sociau e ambientau e eth respècte ara tradicion culturau e identitària que singularizen Aran dauant deth món.

Portada revista Portada revista.