Atau ac a anonciat eth sindic Francés Boya ena session ordinària deth Conselh de Terçon de Quate Lòcs, celebrat aué en Ajuntament de Les, damb era participacion des alcaldes de Bossòst, Les e Canejan, Paco Rodríguez Miranda, Emilio Medan e Carlos Lastera, respectivament; eth conselhèr generau Eduardo Valdecantos e eth còsso der Ajuntament de Bausen, René Bugat.

Eth servici, que comence damb caractèr experimentau, se realizarà un còp per setmana, es dimèrcles, e includirà dus viatges. Gesserà dus còps de cada nuclèu (tàs 10.00 ores e 13.00 ores, de Canejan; e tàs 11.00 ores e tàs 14.30 ores, de Bausen) e ne tornarà en tot gésser de Bossòst entàs 13.00 ores, en direccion tà Canejan, e entàs 14.00 ores, tà Bausen. En andús cassi, passe per Les, en tot arturar-s’i. Aguesti servicis foncionaràn pendent uns mesi de forma provisionau. Dempús se ne harà ua avaloracion entà sajar d’organizar-le definitivament e optimizar-le tant coma sigue possible.

Atau madeish, eth Conselh de Terçon de Quate Lòcs a servit entà formalizar eth convèni de collaboracion entre eth Conselh Generau d’Aran e er Ajuntament de Les peth quau eth Govèrn aranés hè ua aportacion de 60.000 èuros entath finançament deth Centre d’Acuelhuda Toristica (CAT) de Les, que se dedicarà a Occitània coma realitat entà dar a conéisher en marc des centres CAT qu’implante era Generalitat en tota Catalonha. Ath delà, eth Sindic a assegurat qu’es òbres deth Parc deth Portilhon se tròben enes darrères fases, ara demora d’aquerir era propietat d’uns terrèns qu’aurien d’integrar er airau e sus es quaus se n’auie obviat er aqueriment d’ençà deth plantejament deth projècte. D’aguesta forma, eth Conselh Generau procedirà a completar era adequacion des equipaments, atau coma eth bastiment dera part museografica.

La reunió del Consell de Terçó de Quatre LLocs La reunió del Consell de Terçó de Quatre Llocs presidida pel Síndic d´Aran, Francesc Boya. Foto: Conselh Generau.