Er Ajuntament de Bossòst, a trauèrs dera Brigada Municipau d’Òbres, a condicionat era capèla dera Mair de Diu des Nhèus, tanben coneishuda en pòble coma era Vèrge dera Pietat, dera quau aué se’n celèbre eth sòn dia damb ua missa. Es trabalhs an consistit en repassar eth losat e lauar e pintar es parets. Tanben s’an netejat es entorns, e quauqui vesins deth pòble an collaborat, com cada an, a netejar e ornamentar er interior entara celebracion d’aué.
 
Dempús dera missa, se repartirà eth pan benedit e actuarà eth grop de dançaires Es Sautarèths de Bossòst. Era capèla dera Pietat forme part deth conjunt des sèt capèles que se bastiren en sègle XIX entà protegir ath pòble deth colèra (aué se’n consèrven sies), segontes conde era legenda. Totes son plaçades ath torn dera populacion, enes camins qu’amiauen a Bossòst. Totun, aguesta des Nhèus consèrve era pòrta deth sègle XVI, hèt qu’amie a pensar qu’era gleisòla ja auie existit abantes deth XIX.