Eth sindic d’Aran, Francés Boya, a explicat qu’aguesta actuacion “contribuirà ara reactivacion economica locau, perque era òbra generarà naui lòcs de trabalh, e permeterà, per miei deth finançament dera Generalitat, dar un usatge intègre a ua bastissa emblematica deth centre de Vielha, qu’ei propietat deth Conselh”. Segontes Boya, “eth Conselh a agut era oportunitat de profitar aguesta inversion entà mielhorar eth servici ath ciutadan, arrefortir er autogovèrn e mielhorar es condicions de trabalh deth personau deth Departament e es agents deth Miei Ambient”.

Eth Govèrn aranés considère qu’eth projècte dar mès autonomia ara prestacion des servicis restacadi damb eth miei ambient, ua des competéncies mès importantes que gestione era maxima institucion aranesa. Ath delà, s’afronten es naui besonhs pròpris d’ua administracion joena e un autogovèrn en estat d’assolidament e creishement.

Era bastissa, plaçada en carrèr Major, ocupe ua superfícia de 267 m2. Eth projècte tracte de mantier era simplicitat dera construccion tradicionau aranesa per miei d’ua bastissa de superfícia similara ara existenta. Se bastiràn es burèus e espacis collectius entà amassades e recepcion deth public. Damb aguesta actuacion, se mielhorarà notablament era imatge actuau, que serà mès ordenada, sòbria e clara.

Antiga casa forestau de Vielha. Antiga casa forestau de Vielha.