Eth Departament de Governacion, en collaboracion damb eth Servici Meteorologic de Catalonha (SMC), an impulsat era pròva pilòt entà dotar de connectivitat d’internèt as refugis de Colomèrs (Salardú), Saborèdo (Tredòs), Era Honeria (Canejan), Conangles (Vielha) e, dehòra d’Aran, Ernest Mallafré (Espot), Pla de la Font (La Guingueta d’Àneu), e Ventosa i Calvell (Boí).
Damb er accès a internèt de banda ampla, aguesti refugis poderàn mielhorar era gestion diadera, ath delà d’accedir en temps reau as predicions meteorologiques.
Eth sindic a destacat “er esfòrç” deth Govèrn dera Generalitat entà garantir er accès as naues tecnologies des airaus ruraus e de nauta montanha. “Era implantacion de banda ampla enes refugis ei un hèt transcendentau que dignifique e apòrte seguretat as nòstes installacions de montanha a favor des sòns responsables e er ensem des usatgèrs”, segontes Boya.
Ath delà, eth sindic Francés Boya e eth director SMC, David Rodríguez, an signat un convèni de collaboracion, amassa damb representants dera Federacion d’Entitats Excursionistes de Catalonha e eth Centre Excursionista de Catalonha, entà facilitar era comunicacion e er escambi d’informacion enes refugis sauvadi de montanha sus era prevision e observacion meteorologica e de lauegi, atau coma possibles Situacions Meteorologiques de Risc. D’aguesta forma, es refugis auràn accès dirècte ath Butletin Pirenènc, eth Butletin de Perilh de Lauegi e es avisi de risc.
En transcurs der acte, que s’a celebrat ena sedença deth Conselh, eth sindic d’Aran a advocat per “trobar encastres de dialòg e collaboracion entre era administracion e es entitats excursionistes entà desvolopar un concèpte mès integrau dera montanha”, e a metut coma exemple eth “trabalh qu’amien a tèrme es tecnics deth Centre de Prediccion de Lauegi e deth Conselh Generau d’Aran entà aportar informacion e prevencion sus era montanha”.
Ausàs e Boya an presidit aué er acte de presentacion d’aguesta pròva pilòt. Ausàs e Boya an presidit aué er acte de presentacion d’aguesta pròva pilòt.
