Eth parc se trobarà ar aire liure, en aguesta zòna emblematica dera Val d’Aran, plan concurruda pes vesins e es toristes. Se prevé reabilitar er antic refugi entà acuélher eth punt d’informacion e es servicis, e se potenciarà er airau de pic-nic. Aguest parc contierà diuèrsi recorruts, distribusidi en jòcs damb disparièrs grads de dificultat, segontes a explicat era responsabla deth projècte deth Conselh Generau, Sílvia Solà.

Es parcs d’aventura permeten que cada persona, de forma autonòma, pogue hèr totes es activitats, sense cap risc entara sua seguretat e sense besonh d’ua preparacion fisica. Ath delà de reformar eth refugi, s’abilitaràn es elements de besonh entad aguest tipe d’installacions: un circuit infantil, intercomunicat a trauèrs de jòcs e tres cabanes; un circuit familiar entà mainatges de mès de 6 ans; ua gran tirolina coma atraccion fòrta; e un circuit perimetrau de biciclètes de montanha damb ua naua senhalizacion e un quilomètre de recorrut.

Eth sindic a persutat en qu’eth parc serà dubèrt tostemp damb er objectiu que quinsevolh usatgèr pogue gaudir d’aguest airau de léser compartit pes pedanies de Gausac, Aubèrt e Vilac. Totun, se logarà eth materiau de besonh entà esvitar er us indegut des installacions. Ua persona s’encuederà de mantier eth refugi e organizar es activitats. Eth Conselh trabalhe entà qu’eth parc pogue èster dubèrt pendent er ostiu, part dera primauèra e part dera tardor.

Francés Boya a assegurat qu’era iniciativa, avalorada en 127.000 èuros, “seguís damb er esfòrç amiat a tèrme peth Conselh Generau entà promòir eth torisme familiar e crear mès equipaments entath gòi de totes es familhes que demoren ena Val pendent tot er an”.

Dera sua part, eth conselhèr de Torisme, Comèrç e Transpòrt, Juan Antonio Serrano , a especificat qu’eth parc “profite era infraestructura qu’ara existís, ath còp que revitalize un airau plan coneishut pera gent, que damb eth pas deth temps s’a deteriorat fòrça”. “Eth projècte ajude a potenciar Aran coma ua destinacion lidèr de montanha”, a concludit.

Boya a presentat eth projècte a ua cincuantea d’empresaris e trabalhadors. Boya a presentat eth projècte a ua cincuantea d’empresaris e trabalhadors.