Eth Conselh Generau, per miei d’ua subvencion dera Fundación Endesa, a començat a enlumenar er exterior de diuèrses glèises dera Val d’Aran. Eth Govèrn aranés desvolope aguest projècte en 14 glèises que destaquen peth sòn valor istoric e artistic. Aguestes son es de Sant Andrèu de Casau, Sant Pèir d’Escunhau, Sant Martin de Tors de Gausac, Sant Fèlix de Vilac, Sant Estèue de Montcorbau, Sant Pèir de Betlan, Santa Maria d’Arties, Sant Laurenç de Mont, Sant Sernilh de Betren, Sant Martin d’Aubèrt, Santa Maria de Vilamòs, Santa Eulària d’Arròs, Santa Eulària d’Unha e era Mair de Diu dera Purificacion de Bossòst.

Era actuacion suposarà ua inversion totau de 99.000 èuros, finançadi pera Fundación Endesa (66.000 èuros) e eth Conselh Generau d’Aran (33.000 èuros). Francés Boya s’a felicitat pera aguesta iniciativa, pr’amor que “contribuís encara mès a reauçar es béns integrants deth patrimòni istoric e artistic dera Val d’Aran e ajude a projectar toristicament era Val coma ua tèrra que compde damb un naut valor patrimoniau, tant naturau coma culturau, deth quau se’n pòt gaudir tot er an”. 

Era Fundación Endesa a per finalitat er enlumenatge, atau coma activitats connèxes, des monuments e béns integrants deth patrimòni artistic espanhòl o des païsi enes quaus Endesa o es sues empreses participades i son presents. Ena Val d’Aran, era Fondacion a enlumenat era escultura ara lengua e cultura aranesa, prebotjada peth collectiu de Lengua Viua e plaçada ena renauida plaça deth Conselh Generau d’Aran, en Vielha.