Era actuacion de supòrt ara ramaderia extensiva de nauta montanha compòrte era contractacion d'un pastor entà sauvar tot eth ramat e eth pagament d'un icentiu de ueit èuros (en zòna de risc non naut) o dètz èuros (en zòna de risc naut) per cap de bestiar sanejat que s'acuelhe ath Plan, entre d'autes mesures. Tanben s'a condicionat era cabana entath pastor, damb aigua e lum, e s'an installat es pletius, tancaments e cargadors de besonh entath bestiar. Eth transpòrt deth ramat enquiara montanha s'efectuarà a compdar des 07.00 ores ena lana de Les. Eth Plan supòse ua inversion de 100.000 èuros.

Eth conselhèr de Miei Ambient e Pagesia, Francisco Bruna, a declarat qu'eth Plan "constituís ua pròva pilòt que balhe supòrt as ramadèrs d'Aran en tot sajar de preservar era sua activitat enes nòstes montanhes damb es melhors condicions possibles". "A despièch de que se pòden hèr melhores, ei ua prumèra mesura importanta en encastre deth supòrt ara ramaderia de nauta montanha", a afirmat. De hèt, segontes eth conselhèr, eth Conselh Generau a incrementat es còsti de seguiment en antenes, receptors, camères automatiques.

Damb es mesures efetuades s'a invertit en lèu totes es linhes d'actuacion previstes en document de supòrt ara ramaderia aprovat en Plen deth Conselh entath foment dera agropacion de ramats, supòrt economic as explotacions ramadères, racionalizacion e equiparacion des indemnizacions, recuperacion de peisheus, increment de còsti de seguiment e inversions en infraestructures coma cabanes, accèssi, comunicación, tancats, passi canadencs e comades.

Alternativament ath Plan d'Agropaments de Ramats amiat peth Departament de Miei Ambient e Pagesia, es ramadèrs que non volguen acuelher-se as mesures descrites poiràn crubar igualment un incentiu de très èuros per cap sanejat, damb eth compromés per escrit qu'eth sòn bestiar serà sauvat e vigilat es 24 ores. Eth Departament de Miei Ambient e Pagesia se resèrve en aguest cas eth dret d'efectuar es contròtles e comprobacions que considère oportuns.

Ath delà des anteriores mesures, quinsevolh atac de fauna sauvatge se poirà tramitar en tot seguir crubant es baishes degudes a possibles atacs der os o tanben des arrianglos, damb eth corresponent peritatge des tecnics e guardes de Miei Ambient.