Er empresari e consultor austriac Christian Gessl a dat a conéisher ath CES eth plan foncionau deth nau centre innovador, que “implementarà un nau concèpte de desvolopament, restacat damb eth coneishement, e darà naues oportunitats de negòci ena Val d’Aran”. Eth centre se plantege coma un Tecnoparc, damb capacitat entà acuélher empreses innovadores de forma temporau, d’acòrd damb era sua viabilitat.
Ath delà, eth CES darà supòrt as empreses existentes entà aplicar es TIC enes sues activitats de marqueting e comercializacion. Se desvoloparàn naui productes toristics e se crearàn naui sistèmes de comercializacion, coma era implantacion d’ua targeta de fidelizacion entàs productes toristics.
D’un aute costat, era formacion serà un aute des pilars basics deth centre, en encastre dera promocion der aranés, era produccion de contenguts educatius e era imparticion d’estudis universitaris. Tanben acuelherà era investigacion dera nhèu, es lauegi e era seguretat alpina, que desvolope eth Centre de Prediccion de Lauegi deth Conselh Generau d’Aran.
Damb era conferéncia Era internacionalizacion des naui mercats e eth posicionament estrategic dera Val d’Aran, eth professor de Torisme dera Universitat de Girona José Antonio Donaire a assegurat que “eth torisme ei un sector estrategic dera economia qu’a de besonh aplicar era innovacion e es TIC per miei de projèctes coma eth Centre de Casau”.
Eth sindic d’Aran, Francés Boya, a explicat que “non se pòt separar eth desvolopament urbanistic d’un projècte toristic sostenible enes pròplèu ans”, mentre qu’eth conselhèr de Torisme, Comèrç e Transpòrt, Juan Antonio Serrano , a aufrit un balanç dera situacion economica dera Val d’Aran enes darrèri tres ans. Serrano a destacat que “era Val d’Aran ei ua des pògues destinacions toristiques der Estat que resistís eth còp dera crisi economica, a despièch qu’a agut de hèr front, tot d’un còp, a un fòrt increment dera sua ofèrta otelèra, superior ath 12 %”.
Eth Plen deth Conselh Economic e Sociau dera Val d’Aran. Eth Plen deth Conselh Economic e Sociau dera Val d’Aran.
