Eth sindic Francés Boya, qu’a arregraït era labor de Fernández ath long des darrèri ans, a explicat que “aguest cambi respon a ua reestructuracion deth SABS damb er objectiu de hèr front as naui besonhs assistenciaus, arrefortir es cargues executius e, especiaument, mielhorar era qualitat d’atencion sanitària ena Val d’Aran”.

Eth Govèrn aranés enten qu’ei de besonh arténher ua major agilitat ena gestion dera sanitat e mielhorar era capacitat de respòsta ena atencion integrau as usatgèrs der Espitau Val d’Aran. “Non èm deth tot satisfèts damb es resultats obtengudi en quauque airau dera sanitat, e per aquerò ara mos cau daurir ua naua etapa d’impuls e de mès esfòrci”, segontes Boya. Eth sindic a assegurat qu’a compdar d’ara se harà un seguiment dera gestion e era qualitat dera prestacion deth servici sanitari en toti es sòns nivèus.

Uns auti acòrds

Eth Plen a aprovat ua modificacion pressupostària de 459.000 èuros, eth 50 % dera quau ei destinada a inversions, e a introdusit naues previsions pressupostàries enes compdes de Torisme Val d’Aran. Damb aguesti cambis, eth Conselh Generau d’Aran s’assegure un romanent positiu de tresoreria qu’ascendís a mès de 2,1 milions d’èuros. En organisme toristic, ei de 240.000 èuros.

Fin finau, Francés Boya a proposat consensuar damb es Conselhèrs Generaus un escrit de reconeishement e arregraïment as institucions catalanes per auer possat e aprovat era Lei der occitan, aranés en Aran.

Eth Plen deth Conselh Generau d’Aran. Eth Plen deth Conselh Generau d’Aran.