Era campanha aurà seguiment pendent aguest 2009 entara rèsta de campanaus d’Aran, segontes a informat aué era cap de Cultura e Politica Lingüistica, Maria Vergés, qu’a balhat compde des acòrds prenudi en marc dera comission d’Auviatge, amassada aué ena sedença deth Conselh Generau.

En aguest airau, eth Govèrn aranés a previst de hèr visitable eth campanau de Vilac pr’amor qu’ei “un des mès emblematics dera Val d’Aran”, segontes Vergés. Era memòria avalorada entà efectuar era restauracion e er assolidament dera estructura dera bastissa ascendís as 145.000 èuros.

Per un aute costat, era comission d’Auviatge a emetut un informe favorable entath plaçament de dus telesères en airau de Beret, qu’auie sollicitat era estacion Baquèira–Beret. Era cap de Cultura a soslinhat era “importància d’aguesta decision, pr’amor que supòse un reconeishement dera po test at deth Conselh Generau d’Aran en airau dera arqueologia”, a despièch de non auer-ne era competéncia.

Atau madeish, eth Conselh Generau vò impulsar era reparacion urgenta des bòrdes der Ecomusèu Çò de Joanchiquet, que suposarien ua intervencion avalorada en 500.000 èuros, en tot “respectar era imatge actuau”. Totun, Maria Vergés a reconeishut qu’eth Departament de Cultura patís de “dificultats financères” entà materializar era reparacion e a avertit des condicions “desfavorables” entath Conselh que se desprenen deth convèni de collaboracion damb er Ajuntament de Vilamòs, titolar der equipament.

Pr’amor d’açò, andues institucions son ara en procès de renegociar er acòrd. Era volentat deth Govèrn d’Aran ei “hèr-se coresponsable der Ecomusèu, pr’amor que ne hè era gestion intègra”.

El campanar de Betrén. El campanar de Betrén.