Era ambulància formarà part dera flòta de dètz veïculs, des quaus sèt son ambulàncies, que gestione er organisme public de Transpòrt d’Emergéncies Sanitàries dera Val d’Aran (TESVA). Cau destacar qu’aguesta ei era unica empresa en Estat es ambulàncies dera quau complissen damb era normativa europèa sus seguretat viau, atau coma a soslinhat era conselhèra Costa.
Atau madeish, eth Govèrn d’Aran a previst d’adjudicar, enes pròplèu setmanes, er aqueriment d’un nau veïcul de supòrt vitau auançat damb un impòrt de mès de 150.000 èuros. Era ambulància dejà aquerida incorpòre eth simbèu dera crotz blua omologada internacionaument, coneishuda coma era crotz dera vida, e qu’identificarà, a compdar d’ara, es veïculs de TESVA, amassa damb eth color auriò normatiu, aplicat tanben ara rèsta dera flòta.
Er acte a agut lòc damb motiu dera presentacion deth balanç deth nau programa E-BAQ (Evacuacions en Baquèira – Beret), que met en comun era informacion sus es incidéncies e atencions desvolopades en marc dera collaboracion entre TESVA, eth Servici Aranés dera Salut (SAS) e era empresa Baquèira – Beret, pendent era sason d’iuèrn. Des mès de 1.400 accidentadi enes pistes d’esquí ena temporada 2007-08, un totau de 166 esquiaires sigueren evacuadi entar Espitau Val d’Aran, en tot seguir era shèna d’atencion sanitària per miei des protocòls e collaboracions corresponents entà cada cas, atau coma an explicat eth director tecnic de TESVA, Fran Cardeñes, e eth coordinador d’urgéncies der Espitau Val d’Aran, Horacio Soloaga. Eth programa a permetut melhorar de forma substanciau era integracion deth servici public d’emergéncies damb era empresa Baquèira – Beret, en ua epòca de fòrça afluéncia toristica, a compdar d’un indèx d’eficàcia de temps miei de respòsta de quate menutes.
Aguesta collaboracion persute en besonh d’amiar entà dauant un projècte sanitari de qualitat entà toti es usatgèrs residents dera Val d’Aran, pr’amor que servís de baromètre entà arténher ua assisténcia de salut rapida e eficaç entàs ciutadans ena sua vida vidanta. Ath long der an, se genère, de mieja, un totau de 15.000 urgéncies (eth 60 % des quaus corresponen a residents), e, en 2008, s’an activat mès de 3.600 servicis de transpòrt d’emergéncies, eth 25 % des quaus an eth sòn origen ena estacion d’esquí.
Pera sua part, eth sindic Francés Boya a assegurat qu’es negocacions damb es autoritats franceses auancen de forma satisfactòria entà refortilhar era collaboracion damb es sòns espitaus, e a profitat entà anonciar qu’eth Conselh Generau a cursat era sua demana entà ampliar er Espitau Val d’Aran damb er objectiu d’atier es besonhs de melhora des servicis quirurgics e d’emergéncies.
