Eth Conselh Generau ei interessat en prebotjar ocupacion damb projèctes relacionadi damb eth miei ambient, es tecnologies dera informacion e eth coneishement (TIC) e eth torisme culturau e actiu. En concrèt, se trabalhen, en aguesti moments, es possibilitats d’amiar entà dauant projèctes de produccion d’energia de biomassa e d’elaboracion, distribucion e promocion de productes alimentaris e toristics autoctòns. Atau madeish, eth Conselh Generau auance en projècte de creacion d’un clustèr de coneishement, en collaboracion damb eth Parc Scientific e Tecnologic Agroalimentari de Lleida, entà acuélher empreses emprenedores e productes relacionadi damb es TIC.

En sòn objectiu d’implementar era formacion e er assessorament des empreses, eth Conselh Generau balharà aguesti servicis as trabalhadors e trabalhadores dera atencion domiciliària per miei d’un cors especific que darà era informacion laborau qu’eth cambi de modèl normatiu requerís en aguest encastre. Aguest ei un àmbit qu’afècte a fòrça persones ena Val d’Aran.

Eth Conselh Generau d’Aran, per miei d’aguest acòrd globau, amplie eth sòn programa estable de promocion economica en servici de creacion d’empreses (Airau de Promocion Economica, 973 64 18 01). Era maxima institucion aufrís dejà informacion, orientacion, assessorament, facilitats de finançament e supòrt ara consolidacion, enes encastres dera difusion dera cultura d’empresa e er esperit emprenedor, eth foment dera creacion d’activitat empresariau e supòrt as microempreses e petites empreses.