Er objècte dera aprobacion d’aguestes subvencions per part deth Govèrn d’Aran ei “establir ua linha d’ajuda que damb era actuacion deth dalh de propietats o prats pogue mielhorar er entorn e es caracteristiques deth territòri, damb eth manteniment d’un paisatge de mosaic, contròtle deth combustible de huecs forestaus, atau coma balhar supòrt ath sector ramadèr”, atau coma a explicat eth conselhèr de Miei Ambient e Pagesia, Francés Bruna.

Era quantia a subvencionar entad aguesta convocatòria ei de 100 èuros per ectarèa e poiràn beneficiar-se es persones titulares d’explotacions ramadères e persones que dalhen propietats o prats tant siguen dera sua propietat o de d’auti (prealable permís deth proprietari per auança). Eth tèrme de presentacion de sollicituds venç er 1 de junh de 2009.

Ar efècte d’aguestes bases entà poder optar as ajuts, calerà mantier es parcèlles totaument dalhades, sense disminuir era superfícia indivisibla. En cap cas se pòt deishar era èrba dalhada en prat, sonque eth temps que calgue entath secatge, e s’existís un barrament, a d’èster totaument integrat en miei. Un grop de tecnics de Miei Ambient dera maxima institucion ne harà eth seguiment entà determinar era certificacion e era justificacion d’acòrd damb es requisits nomentadi.