Ager se desvolopèc era taula redona Era menopausa: viu-la, gaudís-la , que compdèc damb era participacion de fòrça hemnes deth país. Aué se hè lectura d’un manifèst e se projècte, ena sedença deth Govèrn aranés, eth documentau Las constituyentes , un aumenatge as mairs dera Constitucion Espanhòla.

Diuendres, 11 de març, en Era Audiovisuau de Vielha, aurà lòc era òbra de teatre L’amor no fa mal , a cargue dera companhia CIA SUSANNA BARRANCO. En aguesta òbra, ua hemna joena ve coma era sua vida se transforme a conseqüéncia dera violéncia de genre en sòn entorn familiau. Dimèrcles, 16 de març, en Conselh Generau, era pedagòga e narradora Sílvia Domínguez parlarà sus es Relats entà hemnes: ua trobada damb era nòsta istòria . Dijaus, 16 de març, en Era Audiovisuau de Vielha, se projectarà era pellicula Quiero ser como Beckam , de Gurinder Ghadha.

Ath delà, s’impartissen talhèrs d’autodefensa entà hemnes en Salardú, Vielha e Les, e se pòden visitar es exposicions itinerantes der Institut Catalan des Hemnes sus Hemnes granes, granes hemnes (Espitau Val d’Aran) e eth papèr des hemnes ena Dusau Republica, era guèrra, eth franquisme e era construccion dera democràcia (Residéncia Sant Antòni).

Coma iniciativa nauedosa, era Oficina d’Atencion as Persones prebotge eth Calendari de Hemnes d’Aran 2012 damb materiau istoric sus es hemnes qu’an bastit era istòria dera Val d’Aran. Es persones interessades en aportar documentacion se pòden adreçar tara Oficina d’Atencion as Persones enquiath mes d’octobre.