Era mesura, que se comence a aplicar en IES d’Aran damb era collaboracion e eth supòrt dera AMPA, consistís en mesurar es incidéncies e es assisténcies des alumnes deth centre per miei der aparelh que cada professor gestione damb era finalitat d’agilizar era comunicacion intèrna entre eth personau docent, atau coma exteriora de cap tàs pairs e mairs, en cas que fin finau se volgue optar per avís immediat. Es professors se pòden comunicar entre eri e apuntar-i es incidéncies escolars de cada assignatura, que s’acumulen en forma d’istoriau personalizat, ath temps qu’era informacion se centralize en un servidor, que ne hè era gestion corresponenta.

Eth sindic d’Aran, Francés Boya, eth gestor d’Administracions Publiques de Vodafone España en Lleida, Gonçal Ramón, e eth director der IES d’Aran, Manel Serrabona, presenten aué un nau esturment que, segontes eth Sindic, “supòse un pas mès entà melhorar era qualitat educativa”, pr’amor qu’era aplicacion deth sistèma a permetut d’amendrir eth numerò d’incidéncies des alumnes en aqueri centres a on s’a desvolopat. Serrabona a destacat qu’era actuacion “melhorarà era capacitat de gestion deth temps educatiu, atau coma era comunicacion damb es familhes des alumnes”. Francés Boya a explicat qu’era aportacion dera maxima institucion ven motivada pera “preocupacion deth Govèrn dauant er absentisme escolar” e pera sua volentat de hèr costat ara escòla aranesa damb es accions que se desprenguen deth Plan Pilòt d’Educacion e deth Plan de Modernizacion dera Administracion ena recerca dera digitalizacion des contenguts educatius.