Eth programa, implementat d’ençà der an 2004 en Barcelona, ei format per 3 ans d’estudis universitaris, sotsdivididi en dus quadrimèstres. Es estudis, que van des dera introduccion as naues tecnologies enquia matèries coma psicologia, istòria contemporanèa e introduccion as Servicis Sociaus, se corsarien de forma semipresenciau, per miei d’un campus virtuau e damb ua classa presenciau per setmana (dijaus, de 17 a 20 ores).

Cau matricular-se de dues matèries minimum e sies matèries maximum, pendent eth cors academic. E cada matèria cònste de cinc sessions de tres ores (15 ores lectives). Non se plantejaràn examèns, senon trabalhs virtuaus e individuaus. Ath delà, s’organizaràn seminaris a on es alumnes desvoloparàn es sues aptituds de creativitat e reflexion ar entorn de diuèrsi ahèrs. Totun, eth principau objectiu deth programa ei qu’es alumnes s’ac passen ben, ath delà d’aquerir coneishements e promòir un envielhiment actiu.

Eth programa contemple era possibilitat de hèr un trabalh d’escambi damb era Universidad de Mayores de Granada ath long d’ua setmana. Un viatge acabat satisfasentament eth 3au cors, s’obtierà eth Diplòma d’Extension Universitària.

Eth sindic d’Aran, Francés Boya, qu’a assistit ara session informativa qu’a agut lòc aguesta setmana, a assegurat qu’eth programa “supòse ua magnifica ocasion de possar per prumèr viatge en Aran ua universitat entàs persones de mès de 50 ans entà que gaudisquen d’uns estudis que fòrça d’eri non aueren era oportunitat de corsar quan èren joeni”. Ath delà, “se sage de potenciar es relacions entre persones que faciliten era transferéncia de sabers e introdusir as alumnes as naues tecnologies”.

Session informativa. Session informativa.