Damb era creacion des clubs de producte, es sectors deth senderisme, era BTT e eth benèster ena montanha seguissen es directrizes deth plan entara desestacionalizacion e reactivacion deth torisme aranés, prebotjat peth Conselh Generau e Turespaña. Aguesta a estat ua prumèra amassada qu’aurà contunhitat enes pròplèu setmanes entà “definir es requisits de qualitat entà accedir ad aguesti clubs”, segontes Serrano. Es clubs incorpòren as principaus agents toristics especializadi en cada airau e sector en grops de trabalh qu’an coma objectiu trabalhar ena mielhora des principaus factors clau der èxit qu’afècten ara competitivitat des productes prioritaris. Entath conselhèr, “se comencen a establir atau es bases entara collaboracion entre es sectors public e privat”, segontes mèrque eth Plan de Desestacionalizacion enes sues prioritats entà 2009 en encastre dera planificacion, organizacion e gestion.

Per un aute costat, Torisme Val d’Aran a recebut era visita deth vicepresident dera Federacion Internacionau d’Espòrts Populars, Raymond Claude, entà estudiar era possibilitat de crear un club d’espòrts populars. Aguesta mesura permeterie integrar Aran ena federacion formada per 50 païsi. Aguest organisme internacionau sense afan de lucre prebotge eth senderisme, eth ciclisme, era natacion, er esquí de hons e eth patinatge sus gèu, e compde damb damb mès de 2,5 milions de federats, concentradi, sustot, en Euròpa (Alemanha, Itàlia e França). Aran poirie qualificar es sues rutes damb eth certificat qu’expedís era federacion (eth sagèth IVV), causa que permeterie dar a conéisher era destinacion aranesa entre toti es federats.

Eth Conselh Generau d’Aran Eth Conselh Generau d’Aran a constitusit es clubs de producte enes encastres deth senderisme.