Era amassada entà lançar era Academia dera Lengua Occitana a agut lòc aué ena Val d'Aran jos era presidéncia deth sindic d'Aran, Francés Boya, e eth president der Institut d'Estudis Occitans (IEO), David Grosclaude, e era preséncia dera representanta deth president dera Euroregion Pirenèus-Mediterranèa, Margalida Tous, qu'ei directora generau de Politica Lingüistica des Ilhes Balears. Aguesti, amassa damb uns auti representants des conselhs regionaus de lengua occitana, des universitats qu'impartissen occitan e dera Generalitat, s'an emplaçat a formar era Academia e a amassar ath grop de trabalh entà méter-la en foncionament ath long d'aguest an.

En acte de presentacion, eth sindic Francés Boya a reivindicat "era politica entath reconeishement e impuls d'aguesta institucion lingüistica en marc dera Euròpa des pòbles e regions". Atau madeish, a profitat entà reclamar "era implicacion de d'auti organismes politics coma era Generalitat e era madeisha Euroregion Pirinèus-Mediterranèa". Pera sua part, eth president der IEO a detalhat es objectius e es linhes de trabalh dera naua Academia, que "vò èster ua autoritat de regulacion dera lengua occitana en tot respectar era unitat e era diuersitat dera madeisha damb era participacion der ensem des institucions lingüistiques e des institucions politiques deth territòri dera lengua d'Òc". Tanben a hèt referéncia ara simbologia que supòse qu'era prumèra amassada s'age produsit ena Val d'Aran, a on er occitan ei lengua oficiau.

Era Academia s'encuedarà de definir, mantíer e difóner era codificacion ortografica dera lengua, e trabalharà enes domènis dera grafia, era gramatica, era lexicologia e era toponímia. La formaràn representants de toti es conselhs regionaus der Estat Francés a on se parle er occitan, era Region deth Piemont en Itàlia, era Generalitat de Catalonha e eth Conselh Generau d'Aran. Tanben i seràn representandi es servicis d'educacion des disparions territòris, responsables der ensenhament dera lengua o en occitan, e es sectors d'activitat a on s'emplegue era lengua occitana, coma era recèrca, era edicion, era creacion artistica e literària o era premsa escrita e audiovisuala. Toti aguesti, presenti en acte d'aué, compòsen eth Conselh Plenari, de 50 membres en totau.

Era Academia dera Lengua Occitana. Imatge d'era Academia dera Lengua Occitana.