Es òbres se destinaràn entà renauir era bastissa e transformar-la en un centre foncionau, polivalent e damb capacitat entà acuélher un vivèr d’empreses dedicades ara innovacion toristica e empresariau.

Eth sindic d’Aran, Francés Boya, a explicat qu’eth centre de Casau “serà un espaci de transmission deth coneishement, basat eneth supòrt as naui emprenedors e es nòsti joeni”. Era propòsta contemple era installacion de diuèrses aules entà desvolopar-i projèctes relacionadi damb era aplicacion des naues tecnologies ena administracion e era empresa.

Damb eth supòrt e er assessorament deth Centre Europeu d’Empreses i Innovació de Lleida (CEEI), er antic otèl devierà un centre europèu d’innovacion entà desvolopar idèes innovadores e dotar-les de recorsi entà transformar-les en empreses consistentes, qu’agen perspectives de viabilitat economica e poguen contribusir ara diversificacion dera economia aranesa e era creacion d’ocupacion.

Estudis universitaris

Eth Conselh prevé destinar aguest espaci ara promocion dera cultura e era lengua per miei dera elaboracion de contenguts digitaus e audiovisuaus en aranés. Atau madeish, s’impartiràn estudis universitaris de forma semipresenciau damb era concertacion dera Universitat de Lhèida e era Universitat Oberta de Catalunya. Eth sindic a declarat qu’eth projècte “sage de dar garanties as familhes araneses entà qu’es sòns joeni poguen accedir as estudis superiors, sense besonh de desplaçar-se dehòra dera Val”.

Respècte des òbres de construccion, se plantege era reabilitacion globau dera bastissa de 1.000 m2, damb planta semisosterranèa, tres plantes e humarau, e ua capacitat entà 160 persones. Actuaument, er antic otèl se tròbe en desús, a excepcion deth locau sociau proprietat dera Entitat Municipau Descentralizada.