Ath delà, eth Govèrn d’Aran a agut de hèr front a un contracte blindat d’aguest darrèr, realizat per anterior govèrn, e que suposèc, en cessar en an 2007, ua indemnizacion pactada de 99.000 èuros, fòrça inferior ara estimada s’aguesta s’auesse resòlt per via judiciau. Ère avalorada en 400.000 èuros.

Eth Plen deth Conselh ratificarà deman eth nomenament dera naua directora deth SABS, Maria Àngels Borràs, qu’assomís era direccion, ath delà des sues foncions coma directora assistenciau der Espitau. Atau, ua soleta persona se hè cargue des foncions dera direccion executiva e era direccion assistenciau. Ath delà, se soprimissen sies coordinacions per ua adjuntia ara Direccion Medica e ua auta d’Infermeria.

D’aguesta forma, se concrète eth compromís deth Govèrn deth Conselh Generau entà redusir es foncions e es còsti de direccion e planificacion e arrefortir-ne es executives der organisme que gestione era sanitat publica aranesa, ath temps que se distribusissen aguestes foncions a trauèrs de professionaus qu’exercissen era sua activitat en encastre dera sanitat aranesa.

Eth cambi respon a ua reestructuracion deth SABS damb er objectiu de mielhorar era qualitat d’atencion as usatgèrs e incrementar era agilitat ena gestion sanitària.