En aguest sens, eth sindic d’Aran, Francés Boya, e era conselhèra de Sanitat e Servicis Sociaus, Noelia Costa, s’an amassat damb eth director regionau de Salut en Naut Pirenèu e Aran, Victorià Peralta, e representants des sistèmes aranés e catalan de Salut, en ua trobada qu’a agut lòc ena sedença deth Conselh, en Vielha.
Ua comission tecnica creada ad hoc, formada per professionaus de toti es airaus der Espitau Val d’Aran, susvelharà, a compdar d’aguest mes de seteme, pera aplicacion d’un plan de mesures de prevencion, elaborat dejà en mes d’agost. Entre d’autes accions, s’a establèrt un protocòl entà coordinar es cassi que poguen arribar entar Espitau e s’a refortilhat eth numero de fàrmacs e es antiviraus entà combàter es simptòmes.
Atau madeish, eth Servici Aranés dera Salut (SAS) a metut a disposicion pulsioximètres entà toti es consultòris e maletins medicaus. Es pulsioximètres son es aparelhs que servissen entà diagnosticar es baishi nivèus d’oxigen, un des simptòmes que presente era grip. Era conselhèra Costa a assegurat que “era Val d’Aran ei un des pògui airaus dera region sanitària que compde damb es sufisents pulsioximètres entà tot eth territòri”.
Er Airau Basic d’Atencion Primària amiarà a tèrme, a compdar deth 15 de seteme, ua campanha de sensibilizacion entà qu’era populacion hèsque un usatge avient des servicis assistenciaus aranesi. D’aguesta forma, se recomanarà priorizar es trucades de consulta, en lòc d’assistir presenciaument en centre, en cas qu’er usatgèr age de besonh un assessorament; e se harà seguiment en domicili deth transcurs dera malautia.
Er Espitau a previst d’adequar sales de demora entà mantier isolats as pacients que demoren atencion e se plaçaràn mès punts de recuelhuda de mocadors de papèr. Eth centre dispòse de mascaretes entà despartir, en cas de sospita. Tanben se contemple era possibilitat de reorganizar espacis, circuïts e agendes entà esvitar acumulacions d’usatgèrs en lòcs redusidi.
Es recèptes que s’agen de renauir se poiràn remassar ena recepcion e s’establirà un nau orari de visites as malauts ingressadi en planta, sigue quina sigue era patologia, entà esvitar era preséncia de mès d’ua persona per abitacion.
Noelia Costa a remercat que “totes aguestes mesures son de prevencion e conscienciacion, perque es autoritats sanitàries son premanides entà quinsevolh incidéncia”. Totun, a soslinhat tanben que “non cau generar alarma entre era populacion”. “Era experiéncia demòstre que quan s’apliquen plans de contingéncia e mesures de mielhora dera igièna, eth numero d’incidéncies se place ath madeish nivèu qu’eth dera grip estacionau, qu’en aguesti moments ocasione mès baishes qu’era grip A”, atau coma a explicat.
Era conselhèra a declarat que “Aran seguís damb es recomanacions deth Departament de Salut dera Generalitat, mès eth Conselh a volut híger naues mesures, coma era atencion domiciliària, que pòden èster aplicades damb relativa facilitat en èster era Val un territòri petit”. Costa s’a referit tanben a qu’eth Govèrn aranés “ten en compde, entàs sòns càlculs, ara populacion provenenta dera Ribagòrça catalana e aragonesa, perque er Espitau dera Val d’Aran ei eth sòn espitau de referéncia”. Tanben s’estudie era possibilitat de facilitar, per miei d’Aran Salut, er aqueriment de materiau de desinfeccion de mans entàs empreses qu’ac desiren.
Sanitat met en marcha un plan de contingéncia. Sanitat met en marcha un plan de contingéncia.
