Entà seguir damb es tramits, eth Plen dera maxima institucion s’a amassat, aguest maitin, en session extraordinària entà préner en consideracion era memòria justificativa dera prepausa entara creacion d’ua entitat publica empresariau. Es grops d’Unitat d’Aran (UA) e Partit Renovador d’Arties – Garòs (PRAG) i an votat a favor, mentre que Convergéncia Democratica Aranesa (CDA) s’i a abstengut.
Era prepausa non a podut prosperar pr’amor deth requisit d’aprovar-la damb majoria absoluta. Es grops d’UA e PRAG son formadi per sies conselhèrs, en abséncia per malauita deth conselhèr José Maria Castellà (UA), e eth grop de CDA, ena oposicion, ne represente sies mès.
Eth sindic Francés Boya a explicat que “eth Govèrn amiarà entà dauant era creacion d’ua naua entitat d’emergéncies damb un procediment mès rapid pr’amor deth sòn compromís contrèt damb eth collectiu”. Boya a assegurat que “eth nau sistèma consolidarà eth modèl de pompièrs volentaris en tot garantir era formacion e era especializacion”. Eth nau ens permeterie ua “gestion integrau” des diuèrsi servicis que prèste e aportarie mès seguretat juridica e financèra, atenudi es “problèmes grèus” respècte deth deficit de recorsi e dera manca de nomenaments e formacion laborau.
Er expedient comencèc eth sòn tramit en hereuèr de 2009 damb era constitucion d’ua comission paritària formada per representants des grops e personau tecnic, e s’a anat amassant tot soent entà abordar era reestructuracion.
Eth pòrtavotz de CDA, Carlos Barrera, a manifestat qu’eth sòn grop “non ei en condicions de votar a favor” perque considère qu’a de besonh mès elements de judici. Eth Sindic a declarat qu’eth Govèrn complís damb es sòns compromisi damb es grops politics e eth collectiu de Pompièrs entà préner en consideracion era memòria justificativa “abantes deth mes d’agost”, e s’a referit ara “àmplia participacion” damb qué s’a iniciat eth procès. Pera sua part, eth pòrtavotz deth PRAG, José Antonio Bruna, a afirmat qu’aguesta “non ei ua iniciativa des politics, senon deth madeish collectiu”, e a hijut que s’era naua entitat “non s’amie entà dauant, se trincaràn es illusions des pompièrs”.
Plen extraordinari. Plen extraordinari.
