En aguesti moments, s’amien a tèrme es òbres d’acabament des itineraris de natura e bastiment de guardaders de fauna e passarèles de husta, entre d’autes. Eth Conselh a previst, en aguesta naua licitacion, crear un lac artificiau, un pònt peatonau sus eth lac, ua portada d’aigües e ua bastissa de magazèms. Era actuacion compde damb era collaboracion der Ajuntament de Bossòst, a on se place eth parc.

Eth Sindic a explicat qu’era creacion d’un lac artificiau supòse un projècte “fòrça complèxe” tant pes espècies faunistiques qu’i an de convíuer coma pes installacions annèxes de besonh entà qu’aguesta fauna pogue èster observada. Totun, eth projècte tecnic soslinhe qu’era creacion d’un lac per excavacion en tèrres compactades ei “plan interessant tan per rasons paisatgistiques coma de diversificacion der itinerari peatonau”.

Eth lac se plaçarie en un endret ja amarat d’aigua ena primauèra a on circule un petit arriu, de forma qu’era simpla excavacion possibilite era creacion naturau d’un miralh d’aigua damb circulacion permanenta. Atau, se prevé bastir un pònt de husta peth quau passarie eth camin peatonau principau entà que, d’ençà des grades d’observacion, sigue visibla era fauna e eth gran espaci dubèrt dominat peth lac.

Era naua licitacion contemple era bastissa de magazèms d’aliments e de veïculs e maquinària. Tanben se definís era senhalizacion basica deth parc, tant des punts d’acuelhuda e informacion coma des parcatges, botiga e sales d’exposicions. Atau madeish, se seguiràn es trabalhs de barratge entà animaus carnívors.

Francés Boya a assegurat qu’aguesta cincau fasa “conten es infraesctructures basiques entar inici dera operativitat deth parc”, que poderie veir era lum a compdar deth pròplèu an. Eth Sindic a destacat que “totes es intervencions son d’escàs impacte e de maxima integracion ath miei, en tot respectar era natura e en tot méter a disposicion deth public un espaci naturau entara observacion e coneishença dera montanha e es sues espècies e abitats”.

Passàrela. Passàrela.