Eth contracte d’òbres s’a adjudicat ara empresa Tot Husta Tara Casa, S.L. Atau ac a anonciat aué eth conselhèr generau José Antonio Bruna, qu’a auançat que, era pròplèu setmana, eth Govèrn aranés harà era adjudicacion definitiva entà començar dejà es òbres de reparacion dera cubèrta, qu’ara se tròbe en mau estat. Eth losat presente deficiéncies estructuraus generades peth pas deth temps e es umitats acumulades.

D’aguesta forma, eth Conselh seguís damb era politica d’intervencion en aguest temple deth sègle XIX dempús de resòlver es umitats dera façana posteriora, realizada en mes d’abriu passat. Es umitats afectauen de forma dirècta ara nau centrau. Atau madeish, eth Govèrn d’Aran a hiscat entà declarar era bastissa coma Ben Culturau d’Interès Locau (BCIL) entà pr’amor de garantir-ne era sua conservacion e manteniment, atau coma hè tanben damb es glèises d’Arròs, Vilac e Bausen.

Per un aute costat, eth Conselh a encomanat es trabalhs de neteja e prospeccion des terrèns dera carretèra d’accès a Canejan entà pr’amor d’elaborar eth topografic entà començar a executar es òbres de mielhora, previstes en plan de mielhora des accèssi entàs pòbles d’Aran deth Conselh Generau. En cas de Canejan, era actuacion, avalorada en 125.000 èuros, consistís ena consolidacion des trams de camin que presenten pejors condicions de regularitat superficiau de fèrm. Se contemple era estabilizacion puntuau de talussi, era reparacion de parets e eth plaçament de barrères de seguretat en pònt que crotze er arriu Toran. Ath delà d’aguestes òbres puntuaus, eth Departament de Politica Territoriau e Òbres Publiques elabòre, en aguesti moments, eth projècte constructiu qu’a de perméter aishamplar e reformar intègrament er accès en tram que va de Moron enquiath pòble.

Glèisa de Canejan. Glèisa de Canejan.