Era agrupacion de ramats ei ua apòsta deth Conselh Generau qu’enguan s’a consolidat damb aguesti 2.000 caps de bestiar, qu’apertien a lèu 20 pagesi dera Val. Eth plan compde damb un pressupòst totau de 100.000 èuros. Era actuacion de supòrt ara ramaderia extensiva de nauta montanha a comportat era contractacion d’un pastor; eth manteniment des cabanes damb energia solara, aigua e lum; e eth plaçament de pletius, cargadors e barratges.

Amassa damb era collaboracion des Entitats Municipaus Descentralizades de Bagergue e Unha, era maxima institucion aranesa a tornat a escuélher era ribèra pera sua baisha incidéncia d’atacs d’os, en comparança damb uns auti parçans d’Aran.

Francés Bruna s’a mostrat satisfèt pera consolidacion deth programa, que comencèc en 2008 coma pròva pilòt, e a advocat per seguir damb eth supòrt as pagesi, perque “era sua activitat ei insustituïbla entar equilibri der ecosistèma, era conservacion deth paisatge e era obtencion d’ua matèria prumèra de qualitat entara produccion de productes dera tèrra”.

Fòto dera agropacion amiada a tèrme en 2009. Fòto dera agropacion amiada a tèrme en 2009.