Eth Crist d’Escunhau, ua pèça plan emblematica deth Romanic tardan, a retornat aguesta setmana ath renauit Musèu dera Val d’Aran. Se tracte d’ua magnifica talha de husta deth Crist clauat ena Creu. En tot profitar eth barrament deth musèu pes òbres de remodelacion, dejà ena fasa finau, eth Conselh Generau encomanèc era restauracion dera òbra ara empresa TdArt.

Era assolidament dera policromia s’a amiat a tèrme en Centre de Restauracion de Béns Mòbles dera Generalitat, en Valldoreix, en tot compdar damb era supervision tecnica des responsables d’aguest centre. En totau, era actuacion a suposat ua inversion de 10.000 èuros.

Es dues pèces, tant eth Crist coma era Creu, sauven bona part dera policromia originau. Era cara anteriora dera creu, sus era quau s’empare eth Crist, presente ua policromia en retlèu damb motius floraus. Ena cara posteriora, s’i represente er Agnus Dei e es quate evangelistes.