Es grops que dan supòrt ath Govèrn (UA e PRAG) an votat favorablament ara modificacion de crèdit deth pressupòst, que recep ua injeccion de lèu 600.000 èuros, eth 60 % des quaus corresponen a inversion publica. “Aguesta inversion va adreçada entà generar naui lòcs de trabalh e reactivar era economia”, segontes a explicat eth vicesindic 1èr e conselhèr d’Administracion Publica e Finances, Rufino Martínez. Damb aguest impòrt, eth Conselh mielhorarà e adequarà er hilat de camins, es ariaus recreatius e eth patrimòni aranés. Er acòrd a compdat damb eth vòt contrari de CDA.

Eth Plen deth Conselh a aprovat per unanimitat autrejar era Midalha d’Aur d’Aran a Mn. Jusèp Amiell pera sua contribucion a “recuperar e reviscolar era lengua deth pòble”. Un des sòns darrèri trabalhs a estat era arrevirada ar aranés deth Nau Testament. Era midalha, ua des maximes distincions deth Conselh Generau, li serà concedida peth sindic, es pòrtavotz e er arquevèsque d’Urgelh e coprince d’Andorra, Joan – Enric Vives, en un acte qu’aurà lòc ena serada d’autrejament des Prèmis 17 de junh, eth pròplèu dimèrcles, en Santuari de Nòsta Senhora de Mijaran.

Toti es grops an ratificat ua mocion des associacions municipalistes de Catalonha entà “non utilizar coma element de confrontacion politica” es mesures que se deriven des decrèts aprovats peth Govèrn centrau e era Generalitat entà redusir eth deficit public. Francés Boya a avertit qu’eth Conselh aurà d’adoptar tanben aguestes mesures “per obligacion e responsabilitat”.

Eth Plen deth Conselh Generau d’Aran. Eth Plen deth Conselh Generau d’Aran.