Francés Boya a rebrembat eth compromís deth Ministèri de Foment entà amiar a tèrme aguesta mielhora, un còp s’acòrde ena Comission Mixta entre er Estat e era Generalitat. Aguesta actuacion ei frut dera inversion qu’er Estat a de realizar en Catalonha en matèria d’infraestructures, d’acòrd damb eth mandat dera disposicion addicionau tresau der Estatut d’Autonomia de Catalonha.

Segontes eth tèxte, aguesta inversion s’a d’equiparar ara participacion relativa deth producte interior brut de Catalonha damb relacion ath der Estat entà un periòde de sèt ans, d’ençà dera aprobacion der Estatut, en 2006.

Eth sindic a explicat que “era mielhora d’aguest tram ei ua prioritat, perque aguesta carretèra ei ua via de comunicacion estrategica entath conjunt deth territòri e presente, entre eth tunèl de Vielha e eth caplòc aranés, un estat fòrça deteriorat damb era consegüenta repercussion entara seguretat des sòns usatgèrs”.