Eth Sindic, qu’a intervengut en aranés, s’a interessat per estat des òbres de melhora e pes que se haràn en futur mès immediat entà connectar Vaquèira damb eth cap deth Pòrt.

D’aguesta forma, s’a podut saber qu’eth Govèrn dera Generalitat a invertit 46 milions d’èuros en aguesta carretèra, dera quau n’a elaborat un nau projècte d’òbres per valor de 43 milions d’èuros e a punt d’adjudicar naues òbres avalorades en 10 milions d’èuros. Eth conselhèr Nadal a anonciat qu’er Executiu catalan elabòre, en aguesti moments, eth projècte d’ampliacion dera variant de Vielha damb un còst de 5 milions d’èuros. Atau madeish, era Generalitat harà ua inversion de 12 milions d’èuros entà melhorar eth tram entre Salardú e Vaquèira e entre eth revòlt de Tonhon e eth Cap deth Pòrt.

Respècte ara possibilitat de daurir un tunèl ena Bonaigua, eth Govèrn catalan a previst d’elaborar un estudi entà hèr possibla era sua viabilitat a compdar der an 2016, que contemple era dusau fasa de desvolopament deth Plan d’Infraestructures deth Transpòrt.

Pera sua part, eth Sindic a explicat que “es comunicacions en Pirenèu constituïssen un debat encara viu, constant e permanent en territòri”, un ahèr que pòrte “retrassi istorics” que “cau resòlver a favor dera permeabilitat deth Pirenèu e des comunicacions damb Euròpa”. Per aguest motiu, s’a mostrat satisfèt damb era futura dubertura der aeropòrt d’Alguaire e era possiblitat qu’Aran acuelhe er aeropòrt de montanha qu’era Generalitat a previst de bastir damb eth Plan d’Aeropòrts de Catalonha.

Variant Vielha. Variant Vielha.