D’aguesta forma, “es institucions publiques e es ciutadans poderàn hèr servir un imne omologat enes sues expressions mès cerimonioses e de reconeishença collectiva coma país”, atau coma a manifestat eth sindic Francés Boya.

Atau madeish, es grops damb representacion en Conselh Generau (UA-PSC, CDA-PNA e PRAG) s’an hijut, per miei d’ua mocion conjunta, ara demana qu’eth collectiu Lengua Viua en Aran e era Chambra d’Òc en conjunt d’Occitània an prebotjat entara reconeishença dera lengua occitana coma Patrimòni Mondiau Immateriau dera Umanitat per part dera Organizacion des Nacions Unides entara Educacion, era Sciéncia e era Cultura (UNESCO), en tot profitar qu’enguan ei er An Internacionau des Lengües, establit atau pera ONU.

Per un aute costat, eth Sindic a anonciat en transcurs dera session plenària qu’eth Conselh Generau crearà ua comission especifica damb es grops politics entà hèr seguiment deth desvolopament des acòrds municipaus sus energia electrica damb er objectiu de preservar es interèssi des Ajuntaments e es ciutadans ena aplicacion des drets istorics que permeten es descompdes en consum dera electricitat. Objectiu aguest darrèr que recuelh er esperit dera mocion presentada per CDA sus era comercializacion dera energia en Aran, aprovada per unanimitat.

Entà d’açò, Francés Boya a aufrit as Ajuntaments era interlocucion dirècta e unica deth Conselh Generau, en convèrses damb era empresa Fecsa-Endesa, atau coma er assessorament juridic pertinent en còr dera comission creada ad hoc.

Eth Plen deth Conselh Generau d’Aran. Eth Plen deth Conselh Generau d’Aran.