Era localizacion en Bossòst, obtenguda per miei de timids senhaus qu’indicauen era sua preséncia sense èster visualizada, demòstre era grana mobilitat der animau abantes de començar eth periòde d’ibernacion, hèt que dificulte era sua captura. Eth darrèc còp que se la detectèc demoraue ena Honeria (Canejan).
Pera sua part, eth sindic d’Aran, Francés Boya, a rebrembat qu’eth Conselh Generau seguís damb er operatiu entà capturar ath plantigrad “entà garantir era seguretat des persones atau coma entà preservar era vida dera ossa e esvitar d’aguesta forma naui atacs”. En aguest sens, a profitat entà “reclamar es recorsi avients” as administracions qu’apòsten per seguir damb era reintroduccion dera espècia entà crear er equip de seguiment e contròtle, pr’amor que “ei facil hèr un discurs conservacionista sense qu’aguest vage acompanhat des mieis e mesures de besonh qu’esviten eth sòn fracàs ena practica”.
