Eth sindic d’Aran, Francés Boya, a assegurat qu’er inici deth tràmit entà crear ua acadèmia supòse ua “hita istorica” pr’amor qu’era autoritat der aranés “requè en Institut d’Estudis Aranesi, que deven un organisme autonòm, e es representants legitims deth pòble aranés”. Totun, eth sindic, qu’a demanat ara Generalitat que respècte aguesta iniciativa, a regretat qu’es acòrds non s’agen podut préner per unanimitat: “Auem perdut ua oportunitat entà hèr manifèsta era unitat politica ar entorn dera lengua”. Eth madeish Institut d’Estudis Aranesi e es sues Seccions de trabalh an amiat a tèrme tant eth desvolopament d’aguest procès coma era elaboracion des estatuts e eth reglament.

Entà Francés Boya, era iniciativa “da solidesa ar Institut e reflectís ath còp era ambicion dera Val d’Aran per deféner e hèr a respectar era sua lengua pròpria”. Aguesta prepausa se prebotge d’acòrd damb eth mandat dera Lei der occitan, aranés en Aran, qu’afirme qu’era Generalitat e eth Conselh Generau d’Aran, en termini d’un an a compdar dera entrada en vigor dera lei, “an d’adoptar es mesures de besonh entà complir çò qu’establís er article 4.3.”. Aguest dispause que “er Institut d’Estudis Aranesi a d’èster independent des administracions publiques, a d’arténher pleaments eth caractèr academic que li correspon e a d’auer era autoritat lingüistica entà fixar es convencionalismes d’usatge der aranés d’acòrd damb era consideracion de varietat lingüistica deth tronc occitan comun”. Atau madeish, “a d’auer era autoritat entar assessorament que, en matèria de lengua, li sigue sollicitat”.

D’un aute costat, eth Plen deth Conselh a ratificat, per unanimitat, era iniciativa qu’a de perméter convertir era Resèrva Nacionau de Caça (RNC) deth municipi de Naut Aran en ua Zòna Controtlada de Caça (ZCC), règim que compartís era rèsta dera Val d’Aran. Aguesta proposicion de lei entara segregacion de Naut Aran dera RNC Alt Pallars – Aran se presentarà deuant deth Parlament de Catalonha.

Era iniciativa ja se comencèc a tramitar ena passada legislatura deth Parlament e siguec presentada eth 10 de junh peth sindic d’Aran, Francés Boya, mès decaiguec per finiment dera legislatura. Pr’amor d’açò, eth Conselh reempren es tràmits damb era concertacion der Ajuntament de Naut Aran, es Presidents des EMDs deth tèrme municipau de Naut Aran, atau coma dera Societat de Caça e Pesca de Naut Aran, amassa damb es tecnics deth Conselh Generau d’Aran.

Atau madeish, s’a aprovat, de forma unanima, era Comission de Benèster e Salut, formada peth sindic, un representant de cada grop politic e era responsabla deth SABS. Era comission, possada a iniciativa deth Govèrn aranés, nèish coma un organ de debat e de susvelhança deth foncionament deth servici public de salut e benèster aranés, d’acòrd damb era propòsta manifestada peth sindic d’Aran, en passat plen extraordinari deth 29 de noveme sus era sanitat aranesa.

Eth Plen deth Conselh. Eth Plen deth Conselh.