Eth Conselh Generau ratificarà, en session plenària, era constitucion deth Conselh d’Administracion e eth pressupòst iniciau deth quau se dòte era entitat, de 150.000 èuros. Er organisme incorpòre, de forma provisionau, a Francisco Echevarría, exgerent dera Agéncia Galhèga d’Emergéncies, qu’assomís es foncions de director gerent damb er objectiu d’amiar entà dauant es prumèri passi dera entitat.

Eth Conselh d’Administracion dera entitat publica empresariau, figura juridica adoptada per organisme, incorpòre un representant des pompièrs volentaris, designat pes associacions de pompièrs volentaris dera Val d’Aran. Era rèsta de membres son eth president (eth sindic), era vicepresidenta (era conselhèra de Sanitat e Servicis Sociaus), un membre delegat deth Servici Aranés deth Benèster e era Salut, un membre delegat deth Departament de Salut dera Generalitat, un membre d’Aran Salut e un membre de cadun des grops politics representadi en Plen deth Conselh Generau.

Eth sindic d’Aran, Francés Boya, a assegurat qu’era volentat deth Conselh ei “incentivar eth volentariat enes Pompièrs , en tot mantier e arrefortir eth sòn esperit e era sua tradicion”. Boya a explicat qu’eth nau organisme “permeterà hèr front as emergéncies e desvolopar damb major eficiéncia es pròpries activitats dera entitat”. D’aguesta forma, “s’adòpte un modèl autonòm, diferenciat e cooperador de gestion e organizacion entà mielhorar es servicis publics”.

Eth nau modèl cerque aumentar era cartèra de servicis e prebotjar mesures de prevencion, atau coma mielhorar era cooperacion damb era proteccion civil dera Generalitat. Tanben sage de superar es problèmes derivadi dera manca de formacion e era situacion laborau dispariona, entre d’autes deficiéncies a mielhorar.