Er objectiu deth plan ei plaçar Aran coma destinacion toristica de montanha en àmbit internacionau. Eth sindic Francés Boya s’a mostrat plan satisfèt pera metuda en marcha d’aguest projècte “en uns moments en qué estratègies d’aguest tipe son mès de besonh per mor dera crisi economica globau que mos afècte”, en un acte ath quau an assistit tanben eth vicesindic 3au e conselhèr de Torisme, Comèrç e Transpòrt, Juan Antonio Serrano , e eth president deth Grèmi d’Ostalaria dera Val d’Aran, Manel Gil.

Coma element fonamentau deth Plan, s’elaborarà un estudi de definicion deth mercat potenciau atau coma deth producte aranés coma destinacion de montanha damb un programa d’actuacion entath desvolopament des valors toristics e d’un plan de promocion internacionau des madeishi. Er impòrt der estudi ascendís as 180.000 èuros.

Eth plan annau aplicarà tanben un projècte de comercializacion per un valor de 250.000 èuros damb accions de promocion enes aeropòrts de París, Tarbes-Lourdes e Tolosa, per miei de pannèus publicitaris damb un potenciau de mès de 25 milions d’impactes visuaus enquia finaus d’an.

Atau madeish, se contemplen diuèrsi projèctes d’inversion e dinamizacion. Entre aguesti, s’organizaràn corsi de francés e anglés entà melhorar eth nivèu d’idiòmes enes servicis toristics, s’amiarà entà dauant un projècte de ciclotorisme e s’intervierà ena melhora e senhalizacion des camins d’interès mieiambientau mès significatius dera Val d’Aran.

Lum vèrda entath plan annau de desestacionalizacion deth torisme. Lum vèrda entath plan annau de desestacionalizacion deth torisme.