Enes darrèri mesi, s’a amiat a tèrme ua melhora substanciau deth Camin de  Camon, en Bossòst. Aguesta actuacion a suposat era pavimentacion intègra deth tram entre eth pòble e eth crotze damb eth pònt de Hèr. Er Ajuntament i a plaçat tanben bancs entath descans des passejants. Era òbra, ena quau s’in an invertit 45.00o èuros, ei frut d’un acòrd de collaboracion entre era empresa Endesa e eth consistòri.
 
Eth Camin de Camon ei un des camins mès transitadi pes vesins de Bossòst coma airau de léser e passejada, en tot transcórrer ath costat der arriu Garona. Er alcalde Francisco Rodríguez Miranda a explicat que “aguesta melhora met en valor un camin fòrça utilizat e facilite er accès as vesins que s’i passegen, atau coma as persones qu’i practiquen eth senderisme e era BTT”.
 
Recuperar eth Camin de Santiago aranés
 
Er Ajuntament vò potenciar aguest camin coma un des trams pes quaus passe eth Camin de Santiago, ath sòn pas peth Pirenèu centrau. Eth projècte, impulsat pera Associacion d’Amics deth Camin de Santiago ena Val d’Aran, sage de recuperar era ruta espirituau entre Sant Bertran de Comènge e Roda de Isábena. Eth Camin de Camon, a on se tròbe ua petita gleisòla dedicada a Sant Jaime, formarie part deth Camin de Santiago, “hèt que significarie ua projeccion toristica entà Bossòst e eth Baish Aran”, segontes er alcalde.