D’aguesta forma, s’auance ena redaccion deth projècte que “a de perméter, a trauèrs deth prestigiós nòm d’Isozaki, de persutar enes objectius dera desestacionalizacion e era internacionalizacion, atau coma balhar qualitat e valor hijut ath torisme d’Aran coma destinacion de referéncia ena salut e eth benèster”, segontes eth vicesindic 1èr e conselhèr d’Administracion Publica e Finances, Rufino Martínez, present ena amassada.

Entà Martínez, “ei important qu’eth Conselh Generau balhe supòrt as iniciatives emprenedores des nòsti empresaris” e a avalorat “eth trabalh conjunt damb totes es institucions implicades e es promotors privats, sense eth quau projèctes coma aguest non poderien amiar-se entà dauant”.

En transcurs dera amassada, es representants deth Conselh an demanat
preservar, per miei des informes corresponents, es caracteristiques de rusticitat e eth valor naturau e istoric deth Camin Reiau entre Arties e Garòs ena sua conversion coma via d’accès entar equipament toristic.

Eth camin patirà ua melhora substanciau damb era bastissa, ath delà, d’un nau pònt, previst entà enguan. Aguest serà sufragat peth promotor, ara demora dera aprobacion deth plan parciau pera Comission d’Urbanisme dera Val d’Aran. Manquen ara es informes mieiambientaus qu’a d’eméter eth Departament de Miei Ambient dera Generalitat entà qu’er Ajuntament de Naut Aran ne pogue hèr era aprobacion provisionau.

Tanben s’i an presentat es requisits dera Administracion entara gestion des aigües residuaus e era rèsta de residus que generarà eth complèxe e s’an començat a definir es afectacions der àmbit idrologic dera naua infraestructura.