Un comitè format per representants institucionaus e dera societat civil aranesa a escuelhut a tres candidats per guardon. Cada Prèmi cònste d’ua figura en bronze dera protagonista dera lengenda dera Maladeta, nomentada Blancaflor, simbèu de valentia, coratge e aunestetat, vertuts que tanben definissen Aran coma país.
Es Prèmis 17 de Junh s’autregen en ua serada qu’a lòc ena vesilha dera Hèsta d’Aran, en Santuari de Mijaran, e s’obtien per votacion populara en tot eméter eth vòt en portau web deth Conselh (www.aran.org) e en urnes plaçades enes pòbles. Eth tèrme de votacion venç eth dia 8 de junh.
Es votants, que mercaràn un solet vòt en cada airau, participen d’un sorteg d’un prèmi suspresa relacionat damb cada ua des categories des Prèmis 17 de Junh. Es resultats de votacion se comptabilizaràn dauant de notari.
Es candidats son es que seguissen:
Cooperacion e Accion Sociau
CÀRITAS: Peth sòn prètzhèt en balhar supòrt a diuèrsi grops en situacion de precarietat e risc d'exclusion sociau.
ASSOCIACION DE DONANTS DE SANG: Pera sua activitat solidària e de conscienciacion en tot amiar a tèrme diuèrses campanhes annaus de donacion de sang.
ASSOCIACION CULTURAU ESCUNHAU-CASARILH: Pera creacion d'ua associacion plan activa ena dinamizacion d'ahèrs culturaus e deth desvolopament sociau dera hemna.
Espòrt
URSULA PUEYO: Malhorquina que demore ena Val d’Aran, forme part dera Equipa Paralimpica Espanhòla damb sedença en Centre d’Espòrts d’Iuèrn Adaptats, en Salardú. A participat enes Jòcs Paralimpics de Vancouver 2010, ei campiona d’Espanha en diferentes modalitats d’esquí aupin e a guanhat pòdiums ena Copa d’Euròpa
RUBÉN CASENY: Aranés de 23 ans, membre dera equipa d’esquí de hons e ciclisme (subcampion provinciau e participant dera Copa d’Espanha) deth Grop Esportiu Vitaldent-Aran. En esquí de hons a guanhat en competicions deth calendari de longues distàncies europèu e mondiau, e a medalhes des Campionats de Catalonha e d’Espanha
DOLORES LÓPEZ: Neishuda ena Val d'Aran, ei nominada pera sua dilatada trajectòria esportiva en diferentes modalitats coma era bicicleta, esquí de hons, esquí aupin. A guanhat diuèrsi prèmis en totes es categories tant dera Val d'Aran coma dehòra.
Promocion Economica
CAMINS: Per èster ua empresa pionèra en activitats esportives e de montanha. En tot encetar naues estratègies de cap a un tipe de torisme mens estacionau.
ASSOCIACION DE COMERÇANTS DE BOSSÒST: Pera sua activitat de dinamizacion deth comèrç en baish Aran e pera promocion de productes tradicionaus.
GRÈMI D'OSTALARIA: Pera sua labor en representar, gestionar, deféner e fomentar es interèssi professionaus comuns d'un des sectors economics mès importants dera Val d'Aran.
Cultura
ASSOCIACION INTERCULTURAU OCCITANOCATALANA (ALMOSC): Pera sua constància en incentivar es escambis occitanocatalans.
CINE FÒRUM: Peth sòn trabalh ena dinamizacion culturau damb pellicules e materiau audiovisuau damb un contengut que genère reflexion e debat.
LENGUA VIUA: Pera sua trajectòria ena defensa dera lengua pròpia d'Aran, en tot amiar a tèrme activitats de dignificacion e promocion dera lengua.
Maria Vergés, ena presentacion, en Conselh Generau. Maria Vergés, ena presentacion, en Conselh Generau.
