I an participat un centenat de persones, provenentes de TESVA, er Espitau, eth còs de Pompièrs e Mossos d’Esquadra e deth personau de pistes de Baquèira – Beret. Tanben s’a compdat damb membres d’emergéncies e proteccion civila de França.

Es classes practiques s’an impartit en ua Plaça Medicau Auançada (PMA), qu’a estat installada en Parc de Pompièrs de Vielha, a on tecnics de TESVA an simulat evacuacions en cas de sinistre e an explicat era infraestructura e es materiaus. Tanben i a agut ua intervencion des equips espitalaris, qu’an presentat eth protocòl d’actuacion en PMA. Es alumnes an podut conéisher es actuacions qu’amien a tèrme en França en matèria de tractaments preespitalaris (plan Rouge) e tractaments espitalaris (plan Blanc) dauant de catastròfes damb victimes multiples e situacions damb risc quimic, biologic e nuclear.

Era conselhèra de Sanitat e Servicis Sociaus, Noelia Costa, a soslinhat que “ei eth prumèr còp que s’organize un cors d’aguestes caracteristiques, adreçat a trabalhadors de diuèrsi organismes publics, coma es Mossos, atau coma der aute costat dera termièra”. Segontes Costa, eth Conselh “a previst de seguir damb aguesta formacion transversau, perque servís entà compartir experiéncies entre es collectius dauant d’accidents grèus”.

Noelia Costa a rebrembat qu’eth Govèrn aranés “ven de signar un important acòrd damb er Institut d’Estudis dera Salut que permetarà era formacion en Aran de naui tecnics en desfibrilacion, a compdar der an 2010, a trauèrs d’un programa marc entà garantir era formacion e era acreditacion d’atencions basiques en cassi d’emergéncia”.

Pompièrs. Pompièrs.