Eth pròplèu diuendres dia 3 de Junh tàs 22 ores en “ Farinera deth Clòt serà representada era òbra de teatre Qui sò jo? Deth grop “De persones d’Aran entà toti”.
Era Farinera deth Clòt pòrte des dera Val D’Aran aguest espectacle interpretat per Montse Alós, Olga Besolí, Aida Castro, Sara Estepa, Judith Jiménez, Keith Kirwen, Lola López, Lourdes Martinez, Joan Riu e Xavi Turo; es quaus dan vida a tres scenes independentes que parlen deth ahèr de coneisher-se a un madeish e deth viatge interior que mos connècte damb aquerò vertaderament autentic que demore laguens nòste.

Ua òbra escrita e dirigida per Pax Dettoni que mos convide, damb un ton comic, ara reflexion personau e collectiva sus era responsabilitat individuau qu'auem enes nòstes vides e ena societat ena qué viuem. Eth cambi s’inície en nòste interior e sonque d’aquiu estant , seram capables de víuer amassa en un nau paradigma de patz, respècte e libertat.

Qui sò jo? Ei era prumèra òbra de teatre en aranés que se programe en Barcelona e arribe pòc dempús qu’eth Parlament de Catalonha aprovèsse era “Lei der occitan, aranés en Aran”. Era representacion va acompanhada de subtitulacion en catalan e compde damb eth supòrt deth Conselh Generau d’Aran.