En aguest sens, eth Departament de Torisme deth Govèrn aranés manten contactes damb era empresa EVALIA, que promò e explòte era pista de gèu d’Arties, entà que se pogue mantier dubèrta pendent tot er iuèrn e damb un orari mès flexible.

Damb aguestes mesures, eth conselhèr Juan Antonio Serrano se met a disposicion dera direccion deth Palai de Gèu entà minimizar es efèctes economics, laboraus e toristics e redusir er impacte derivat deth barrament d’un des equipaments publics mès emblematics dera Val d’Aran.

Juan Antonio Serrano a manifestat era sua preocupacion pera pèrta economica en Vielha d’un des sòns maxims atractius toristics, ja qu’eth barrament dera pista de gèu repercotís ena imatge toristica e ena vida esportiva e economica deth país.

Era pista exteriora promoiguda per EVALIA, damb eth supòrt de Torisme Val d’Aran, se placèc en Arties, es passades hèstes de Nadau, coma un equipament ludic entà complementar era activitat der esquí. En un prumèr moment, se volie installar ena plaça deth Conselh Generau, en Vielha, mès non compdèc damb eth permís der ajuntament.