Eth Camin Reiau, en senderisme, e es Pedals de Foc e Occitània, en BTT, son quaques des propòstes toristiques qu’expòse Torisme Val d’Aran en recinte heirau de Barcelona, que compde damb era participacion d’empreses araneses. Era ofèrta va adreçada ara promocion deth torisme de montanha ena sason d’ostiu, en tot complir damb es linhes d’actuacion que mèrque eth plan de desestacionalizacion e internacionalizacion entà reactivar eth torisme aranés.

Pedals d’Occitània

Ei ua activitat entà descurbir ua naua dimension deth Pirenèu, en tot balhar era possibilitat de hèr un recorrut en biciblèta de montanha per tota Occitània. Se tracte d’un itinerari de 220 quilomètres entre Aran e Comenges, en tot profitar es infraestructures e equipaments de torisme rurau dera zòna e es pistes e camins que les connècten. Mès informacion: www.pedalsdoccitania.com

Camin Reiau

Aguesta propòsta permet recórrer 150 quilomètres pes camins qu’abantes comunicauen es 33 pòbles dera Val d’Aran. Constitusís ua des activitats mès atractives deth Pirenèu entàs aimants deth senderisme. Mès informacion: www.caminreiau.cat